ඔස්ට්‍රේලියාව තුළ රැකියාවල නියුතු වීමට අදාළ සංශෝධන කිහිපයක් ෆෙඩරල් රජය විසින් ප්‍රකාශයට පත් කර තිබෙනවා.
ඒ අනුව ශ්‍රම බලකාය පුලුල් කිරීමේ අරමුණින්, දැනට විශ්‍රාම ගොස් සිටින එහෙත් නැවතත් රැකියාවක නිරත වීමට කැමති පුද්ගලයන් හට ලබාදෙන දීමනා ඉහළ නැංවීමටයි යෝජනා වී ඇත්තේ.
ඊට අමතරව දැනටමත් Jobseeker වැනි දීමනා ලබන පිරිස් වෙත හිමිවන සහන කාලසීමාවන්ද ඉහළ දැමීමට තීරණය වී තිබෙනවා.
විශ්‍රාම වැටුප් සඳහා අලුතින් සුදුසුකම් ලබන්නන් සඳහා work bonus ශේෂය ඩොලර් 4,000 දක්වා ඉහළ දැමීමටයි ෆෙඩරල් රජය සැලසුම් කරමින් සිටින්නේ.
දැනටමත් විශ්‍රාම වැටුප් ලබන පිරිස් සඳහා එම ශේෂය ඩොලර් 7,800 සිට ඩොලර් 11,800 දක්වා ඉහළ දැමෙනු ඇති.
පාර්ලිමේන්තුවේදී අදාළ සංශෝධන සම්මත වුවහොත් ලබන ජනවාරි 01 දා සිට බලාත්මක කිරීමටයි රජය සූදානමින් පසුවන්නේ.
2026-27 වසර සඳහා ෆෙඩරල් රජය විසින් මේ වෙනුවෙන් වෙන් කර ඇති මුදල ඩොලර් මිලියන 85 ක්.
