නිව් සවුත් වේල්ස් ප්‍රාන්තයේ සෞඛ්‍ය වියදම් සඳහා වාර්ෂිකව ඩොලර් බිලියන 33 ක මුදලක් වෙන්කිරීම සම්බන්ධයෙන් විමර්ශනයක් ආරම්භ කර තිබෙනවා.
මාස 12 ක් පුරා පැවැත්වෙන මෙම විමර්ශන කොමිසමේ සභාපතීත්වයට පත්කර ඇත්තේ ජ්‍යෙෂ්ඨ නීතීඥවරයෙකුයි.
නිව් සවුත් වේල්ස් සෞඛ්‍ය අමාත්‍ය රයන් පාර්ක් පසුගිය දා ප්‍රකාශ කළේ සෞඛ්‍ය ක්ෂේත්‍රය තුල අධික වියදමක් දැරීමට සිදුවන අංශ හදුනාගෙන එහි වු නාස්තිය අවම කිරීමට අපේක්ෂා කරන බවයි.
ප්‍රාන්ත අයවැයෙන් තුනෙන් එකකට ආසන්න ප්‍රමාණයක් සෞඛ්‍ය පද්ධතිය සඳහා වැය වන අතර එසේ වැය වන සෑම ඩොලරයක්ම අත්‍යවශ්‍ය අංශ සඳහා පමණක් යෙදවීම වත්මන් ලේබර් පක්ෂ රජයේ අරමුණ බවද ඔහු වැඩිදුරටත් සඳහන් කළා.
නාස්තිය අවම කරමින් රෝහල් කාර්ය මණ්ඩලය සහ රෝගීන් සඳහා වඩාත් හොද සෞඛ්‍ය පද්ධතියක් ඇති කිරීම මෙහි අරමුණ බවයි නිවු සවුත් වේල්ස් සෞඛ්‍ය අමාත්‍ය රයන් පාර්ක් වැඩිදුරටත් පෙන්වාදුන්නේ.
කෙසේවෙතත් මෙලෙස විමර්ශණයක් ආරම්භ කිරීම සම්බන්ධයෙන් නිවු සවුත් වේල්ස් වෛද්‍ය සංගම් විරෝධය පළ කරනවා.
එමගින් ඉදිරිපෙළ සෞඛ්‍ය සේවා කප්පාදුවක් සිදුවනු ඇති බවටයි වෛද්‍යවරුන් චෝදනා නගන්නේ.
