ඉහළ ජීවන වියදම හමුවේ අමතර ආදායම් සොයා දෙන මුවාවෙන් සිදුකරන මූල්‍ය අපරාධ ජාවාරමක් සම්බන්ධයෙන් වෙස්ට්පැක් බැංකුව විසින් තොරතුරු අනාවරණය කරගෙන තිබෙනවා.
ආර්ථික වශයෙන් අර්බුදයට පත්ව සිටින ඔස්ට්‍රේලියානුවන් ඉලක්ක කරගනිමින් මෙම ජාවාරම සිදුකරන බවටයි විමර්ශනවලදී අනාවරණය වී ඇත්තේ.
ඉන් වැඩි පිරිසක් අවුරුදු 18 ත් 40 ත් අතර වයසේ පසුවන කාන්තාවන් බව සඳහන්.
රැකියා සොයා දෙන මුවාවෙන් සිදුකර ඇති මූල්‍ය වංචා සංඛ්‍යාව 2022 වසරට සාපේක්ෂව මෙම වසරේදී සියයට 1000 ඉක්මවා ගොස් තිබෙනවා.
පසුගිය වසරේදී ඉතා සුලු සිදුවීම් කිහිපයක් වාර්තා වුවද මෙම වසරේ මේ දක්වා කාලය තුළදී පමණක් එවැනි සිදුවීම් 20,231 ක් සටහන්වී ඇති බවයි වාර්තා වන්නේ.
වට්ස්ඇප් වැනි සමාජ මාධ්‍ය යෙදවුම් හරහා අමතර ආදායම් සෙවීමේ ක්‍රම පිළිබද පණිවිඩ ලැබුණ ද ඒ පිලිබද සොයාබැලීමකින් තොරව ලියාපදිංචි වීම් සිදු නොකරන ලෙසයි ඉල්ලීමක් කෙරෙන්නේ.
විශේෂයෙන් බැංකු ගිණුම් අංක මෙන්ම පුද්ගල අනන්‍යතා සහතික වල පෞද්ගලික තොරතුරු කිසිදු සොයාබැලීමකින් තොරව හුවමාරු කර නොගන්නා ලෙසටද දැනුම්දීමක් සිදු කෙරෙනවා.
එමෙන්ම සැකකටයුතු කිසිදු විද්‍යුත් පණිවුඩයකට ප්‍රතිචාර නොදක්වන ලෙසටයි තවදුරටත් ඉල්ලීමක් කෙරෙන්නේ.
