ඔස්ට්‍රේලියානු කාන්තා පාපන්දු කණ්ඩායම විසින් මෙවර පාපන්දු ලෝක කුසලානය ජයගතහොත් ඔස්ට්‍රේලියානුවන්ට පොදු නිවාඩු දිනයක් ලබාදිය යුතු බවට යෝජනාවක් ඉදිරිපත් වී තිබෙනවා.
අගමැති ඇන්තනී ඇල්බනීස් විසින් ඊට අදාළ ඉගියක් පළකර ඇති අතර නිවු සවුත් වේල්ස් අගමැති ක්‍රිස් මින්ස් ද පවසා ඇත්තේ තමන්ද ඊට සහය දක්වන බවයි.
ඩෙන්මාර්කය 2-0 ක් ලෙස පරාජයට පත්කරමින් ඔස්ට්‍රේලියානු කාන්තා පාපන්දු කණ්ඩායම මෙවර ලෝක කුසලානයේ අර්ධ අවසන් පූර්ව වටයට සුදුසුකම් ලබාගැනීමට ඊයේ සමත් වුණා.
නිවු සවුත් වේල්ස් අගමැතිවරයාගේ ස්ථාවරය වන්නේ කාන්තා පාපන්දු කණ්ඩායම අවසාන මහා තරගයට සුදුසුකම් ලැබුවහොත් එම දිනය පවා නිවාඩු දිනයක් ලෙස ප්‍රකාශයට පත් කල යුතු බවයි.
එහෙත් අවසාන මහා තරගය ඉරිදා දිනයට යෙදී තිබීම හමුවේ එය ප්‍රායෝගික නොමැති බවටද මත පළවී තිබෙනවා.
කිසියම් අයුරකින් ඔස්ට්‍රේලියානු කාන්තා පාපන්දු කණ්ඩායම මෙවර කුසලානය දිනාගත හොත් එක් එක් ප්‍රාන්තය මට්ටමින් නිවාඩු දින ප්‍රකාශයට පත් කල යුතු බවටද යෝජනා වී ඇතත් මෙතෙක් කිසිදු අවසන් තීරණයක් ගෙන නැහැ.
