ඔස්ට්‍රේලියාවේ දෙමාපිය වීසා අයදුම්පත් 137,000 ක් පමණ තවමත් සලකා බලා නොමැති බව නවතම වාර්තාවක් අනාවරණය කරනවා.
මෙය ඔස්ට්‍රේලියානු වීසා පද්ධතියේ ප්‍රබල පසුබෑමක් බවයි එම වාර්තාවේ සඳහන් වන්නේ.
මෙලෙස දෙමාපිය වීසා අයදුම්පත් ගොඩ ගැසී ඇති බැවින් ඔස්ට්‍රේලියාවේ දෙමාපිය වීසා ලබා ගැනීම සඳහා වසර 30 ත් 50 ත් අතර කාලයක් බලා සිටිය යුතු බවටද එම වාර්තාව පෙන්වා දෙනවා.
ලබාදෙන දෙමාපිය වීසා ප්‍රමාණය වැඩි කිරීමට හෝ මෙම වීසා බලපත්‍රය අහෝසි කිරිමට පියවර ගත යුතු බවයි ඔවුන් නිර්දේශ කරන්නේ.
දෙමව්පියන් සඳහා කෙටි කාලීන වීසා බලපත්‍ර ලබාදීමේ අරමුණින් ඔවුන්ට ඔස්ට්‍රේලියාවේ ස්ථිර පදිංචිය ලබාදෙන වීසා මුළුමනින්ම ඉවත් කිරීමට මෙම වසර මුළදී යෝජනා කෙරුණා.
ඔස්ට්‍රේලියාවේ වාර්ෂික සංක්‍රමණ වීසා කෝටාවේ සාමාන්‍යයෙන් වසරකට දෙමාපිය වීසා සඳහා ලබා දෙන්නේ 8,500 ක පමණ කෝටාවක් පමණයි.
දැනට ගොඩ ගැසී ඇති අයදුම්පත් ප්‍රමාණය හා සැසඳීමේදී එම කෝටාවේ ප්‍රමාණාත්මක අගය පිළිබඳවද ගැටළුවක් මතුවනවා.
SOURCE / CREDIT – SBS
