ඔස්ට්‍රේලියාවේ නිවාස කුළී ගාස්තු ඉහළගොස් එම වෙළඳපොල තුළ දැඩි අර්බුදයක් ඇතිවීමට හේතුව ප්‍රමාණය ඉක්මවා විදෙස් සිසුන් ගෙන්වා ගැනීම බවට ස්වාධීන ආයකනයක් චෝදනා කරනවා.
මෙතෙක් වසරකට පැමිණි විදෙස් සිසුන් සංඛ්‍යාව 122,000 ක් වැනි අගයක පැවති නමුත් පසුගිය වසරේදී 250,000 ඉක්මවූ සිසුන් පිරිසක් මෙරටට පැමිණ ඇති බවයි සංඛ්‍යාලේඛණවල දැක්වෙන්නේ.
ඔවුන් විසින් කුළී නිවාස සියයට 70 ක් පමණ වෙන් කරවා ගැනීම හමුවේ සෙසු සංක්‍රමණික ප්‍රජාවට කුළී නිවාස ලබා ගැනීමේදී දැඩි අපහසුතාවයන්ට මුහුණ පෑමට සිදුවී ඇති බව මෙම වාර්තාවේ සඳහන්.
කොවිඩ් සමයේදී අහිමි වූ ඩොලර් බිලියන 40 ක් පමණ වටිනා විදෙස් ශිෂ්‍ය වෙළඳපොල නැවත ලබාගැනීමට ෆෙඩරල් රජය නිසි සැළසුමක් නොමැතිව කටයුතු කිරීමෙන් නිවාස අර්බුදය උග්‍රවී ඇති බවටයි ඔවුන් චෝදනා කරන්නේ.
2023-24 මූල්‍ය වර්ෂය තුළදී තවත් ජාත්‍යන්තර සිසුන් 187,000 ක් පමණ රටට ගෙන්වා ගැනීමට ද ෆෙඩරල් රජය උත්සාහ දරමින් සිටිනවා.
මෙම ගැටලුව කඩිනමින් විසඳීමට පියවර නොගතහොත් 2028 වසර වනවිට ඔස්ටේ්‍රලියාවේ නිවාස 252,000 ක පමණ උග්‍ර හිගයක් නිර්මාණය වනු ඇති බවටයි මෙම වාර්තාව අනතුරු අගවා සිටින්නේ.
