ලිංගික අතවර සිදුකල බවට කාන්තාවන් 03 දෙනෙකු විසින් කර ඇති චෝදනා හමුවේ සෙනෙට් සභික ඩේවිඩ් වෑන් වහා ධුරයෙන් ඉල්ලා අස්විය යුතු බවට විපක්ෂ නායක පීටර් ඩටන් අවධාරණය කරනවා.
පැය 48 ක් වැනි කෙටි කාලයක් තුළ එල්ලවූ මෙම චෝදනා සුලු කොට තැකිය නොහැකි බවයි විපක්ෂ නායකවරයා අවධාරණය කරන්නේ.
ස්වාධීන මන්ත්‍රීනී ලිඩියා තෝර්ප් විසින් පෙරේදා දිනයේදී පළමුවරට මෙම චෝදනා එල්ල කල අතර ඊයේ දිනයේදී ලිබරල් සෙනෙට් සභික ඇමැන්ඩා ස්ටෝකර් විසින් ද එවැනිම චෝදනාවක් එල්ල කලා.
සෙනෙට් සභික ඩේවිඩ් වෑන් විසින් තමන්ට ලිංගික අතවර සිදුකල බවට නම හෙළි කල නොහැකි තවත් කාන්තාවක්ද විපක්ෂ නායකවරයාට පැමිණිලි කර තිබෙනවා.
මෙම සියලු චෝදනා සම්බන්ධයෙන් විමර්ශනයක් පවත්වා නිවැරදිකරු වන තුරු සෙනෙට් සභික ධුරයෙන් තාවකාලිකව හෝ ඉල්ලා අස්වීම සෙනෙට් සභික ඩේවිඩ් වෑන් ගේ වගකීම විය යුතු බවයි විපක්ෂ නායක පීටර් ඩටන් සඳහන් කරන්නේ.
