ඔස්ට්‍රේලියාව සහ ඉන්දියාව ටෙස්ට් ලෝක ශූරතා අවසන් තරගය එංගලන්තයේ ඕවල් ක්‍රීඩාංගණයේදී අද ආරම්භ වනවා.
2021 – 2023 වසරවලදී කණ්ඩායම් 09 ක් සහභාගී වූ ටෙස්ට් තරග ප්‍රතිඵල මත ප්‍රසාද ලකුණු සටහනට අනුව පළමු සහ දෙවන කණ්ඩායම් අවසන් තරගයට සුදුසුකම් ලබාගත්තා.
ඒ අනුව පළමු ස්ථානය ලබාගත් ඔස්ට්‍රේලියාව තරග 19 න් 11 ක් ජයගත් අතර ඉන්දියාව තරග 18 න් 10 ක් ජයගෙන දෙවන ස්ථානයට පත්වුණා.
මෙම තරගය ජයගන්නා කණ්ඩායම පිළිබඳව හිටපු සුපිරි ක්‍රිකට් තරු 05 ක් පළකළ අනාවැකියක් වෙත මේ වනවිට ලෝකයේම අවධානය යොමුවී තිබෙනවා.
රිකී පොන්ටින්, රවී ශාස්ත්‍රී, වසීම් අක්‍රම්, ඉයන් බෙල් සහ රොස් ටේලර් යන ක්‍රීඩකයින් විසිනුයි එම අනාවැකිය පළකර ඇත්තේ.
මෙම ක්‍රීඩකයින් 05 දෙනා අතරින් 03 දෙනෙකුම පවසා ඇත්තේ ටෙස්ට් ලෝක ශූරතාවය ඔස්ට්‍රේලියාව විසින් ජයගනු ඇති බවයි.
ඔස්ට්‍රේලියා හිටපු සුපිරි ක්‍රීඩක රිකී පොන්ටින්, පකිස්තානයේ හිටපු සුපිරි ක්‍රිකට් ක්‍රීඩක වසීම් අක්‍රම් සහ නවසීලන්ත හිටපු සුපිරි පිතිකරු රොස් ටේලර් මෙලෙස ඔස්ට්‍රේලියාව ජයගන්නා බවට අනාවැකි පළකර තිබෙනවා.
කෙසේ වෙතත් ඉන්දියාවෙන් බිහිවූ සුපිරි ක්‍රීඩකයෙකු වන රවී ශාස්ත්‍රී එහිදී අනාවැකි පළකර ඇත්තේ තරගයේ ප්‍රථමයෙන් ඉදිරියට එන කණ්ඩායමට වැඩි වාසි අත්විය හැකි බවයි.
එසේම එංගලන්ත හිටපු සුපිරි ක්‍රීඩක ඉයන් බෙල් පවසා ඇත්තේ පන්දුවට හොඳින් පහරදෙන කණ්ඩායමට තරගයේ වැඩි වාසි අත්විය හැකි බවයි.
