වික්ටෝරියා ප්‍රාන්තයේ මගී ප්‍රවාහන බස් රථවල ආසන පටි පැළඳීම අනිවාර්ය කිරීම කෙරෙහි ප්‍රාන්ත රජයේ අවධානය යොමුවී තිබෙනවා.
ප්‍රාන්ත අගමැති ඩැනියල් ඇන්ඩෲස් සඳහන් කලේ දින කිහිපයකට පෙර පාසල් සිසුන් 46 දෙනෙකු ගමන් කරමින් තිබූ බස් රථයක් ට්‍රක් රථයක ගැටීමෙන් සිදුවූ අනතුර ඊට ආසන්නම හේතුව බවයි.
වික්ටෝරියා ප්‍රාන්ත නීතියට අනුව, බස් රථවල ඉදිරිපස වීදුරුවට මුහුණලා ආසනයක් නොමැතිනම් ආසන පටි පැළඳීම අනිවාර්ය වන්නේ නැහැ.
කෙසේවෙතත් පාසල් බස් රථවල ආසන පටි පැළඳීම හැකි සෑම අවස්ථාවකදීම සිදුකරන ලෙසයි උපදෙස් දී ඇත්තේ.
පසුගියදා සිදුවූ රිය අනතුරෙන් පාසල් සිසුන් 10 දෙනෙකු තුවාල ලැබූ අතර ඒ සම්බන්ධයෙන් ට්‍රක් රථ රියදුරෙකු මේ වනවිට අත්අඩංගුවේ පසුවනවා.
