ක්වීන්ස්ලන්ඩ් පොලිස් සේවයට එක්වන විශ්ව විද්‍යාල සිසුන් ශිෂ්‍ය ණය ලබාගෙන ඇත්නම් ඩොලර් 20,000 ක උපරිමයක් සඳහා වන සහනයක් ලබාදීමට ප්‍රාන්ත රජය තීරණය කර තිබෙනවා.
අධියර කිහිපයක් යටතේ එම මුදල් ගෙවීම් සිදුකරන අතර ඩොලර් මිලියන 90 ක මුදලක් ඒ සඳහා වෙන් කර ඇති බවයි ප්‍රාන්ත අගමැතිනිය සඳහන් කලේ.
මනෝ විද්‍යාව – අපරාධ විද්‍යාව – සමාජ සේවා සහ උපදේශන යන පාඨමාලා හදාරන සරසවි සිසුන්ට මේ සඳහා ඉල්ලුම් කල හැකියි.
ප්‍රාන්තයේ ඉහළ යමින් පවතින තරුණ අපරාධ අවම කිරීමේ අරමුණ ඇතිවයි මෙලෙස ආධුනික පොලිස් නිළධාරින් පිරිසක් බඳවා ගැනීමට ක්වීන්ස්ලන්ඩ් ප්‍රාන්ත රජය සැළසුම් කර ඇත්තේ.
අවම අපරාධ වයස් සීමාව ඉහළ දැමීමට ප්‍රාන්ත කිහිපයක් කටයුතු කරමින් සිටින පසුබිමකදීයි ක්වීන්ස්ලන්ඩ් ප්‍රාන්ත රජය මෙම පියවර ගෙන ඇත්තේ.
