2022-2024 මූල්‍ය වර්ෂ අතර කාලයේදී සංක්‍රමණිකයන් ලක්ෂ 07 කට වැඩි පිරිසක් ඔස්ට්‍රේලියාවට පැමිණෙනු ඇති බවට පුරෝකථනය කර තිබෙනවා.
ෆෙඩරල් රජය හඳුන්වාදෙන නව සංක්‍රමණ රෙගුලාසි මෙන්ම විදෙස් සිසුන් සහ working holiday වීසා ලාභීන් වැඩි වශයෙන් පැමිණීම ඊට හේතු බවටයි හෙළිකරගෙන ඇත්තේ.
කොවිඩ් වසංගතය හමුවේ දේශ සීමා වසා තැබීමත් සමග 2020-2021 කාලයේදී මෙරටට පැමිණි සංක්‍රමණිකයන් සංඛ්‍යාව 85,000 ක් වැනි පහළ අගයකට පත්ව තිබුණා.
2022-23 කාලයේදී එය ලක්ෂ 04 ක් ලෙසද 2023-24 මූල්‍ය වර්ෂයේදී 315,000 ක් ලෙසද පවතිනු ඇති බවටයි අනාවැකි පළවන්නේ.
කෙසේවෙතත් කොවිඩ් වසංගතයට පෙර පැවති සංක්‍රමණික පැමිණීම් තත්වයට පැමිණීමට ඔස්ට්‍රේලියාවට 2029 හෝ 2030 වසර වන තෙක් බලාසිටීමට සිදුවනු ඇති බවටයි නවතම වාර්තාවක් පුරෝකථනය කර සිටින්නේ.
මේ අතර ලිබරල් විපක්ෂ සන්ධානය චෝදනා කරන්නේ ඉහළ යන සංක්‍රමණිකයන් සංඛ්‍යාවට මුහුණපෑමට සිදුවන ගැටලු පිළිබඳ ලේබර් පක්ෂ රජය කිසිදු අවධානයක් යොමුකර නොමැති බවයි.
