අමෙරිකා ජනාධිපති ජෝ බයිඩ්න් ලබන මාසයේදී ඔස්ට්‍රේලියාවේ නිල සංචාරයක් සඳහා පැමිණෙන බව තහවුරු වී තිබෙනවා.
ඒ මැයි 24 වනදා සිඩ්නි ඔපෙරා හවුස් හිදී පැවැත්වෙන ක්වඩ් (Quad) රාජ්‍ය නායක සමුලුව සඳහා සහභාගී වීම සඳහායි.
අමෙරිකාව – ඉන්දියාව – ඔස්ට්‍රේලියාව සහ ජපානයේ රාජ්‍ය නායකයයන් ක්වඩ් රාජ්‍ය නායක සමුලුව නියෝජනය කරනවා.
එම සමුලුව සඳහා ඔස්ට්‍රේලියාව සත්කාරකත්වය දරනු ලබන්නේ පළමු වරට වීම විශේෂත්වයක්.
ආසියානු පැසිෆික් කලාපයට බලපාන පොදු ගැටලු මෙන්ම චීනයෙන් එල්ලවන බලපෑම් සම්බන්ධයෙන් මෙහිදී දීර්ඝව සාකච්ඡා කිරීමට නියමිත බව සඳහන්.
පසුගිය වසරේ ජපානයේ ටෝකියෝ නුවර පැවති ක්වඩ් රාජ්‍ය නායක සමුලුව සඳහා අගමැති ඇන්තනී ඇල්බනීස් සහභාගී වුයේ ෆෙඩරල් මැතිවරණය ජයගෙන දින කිහිපයක් ඇතුළතයි.
මේ අතර ලබන වසරේදී පැවැත්වෙන අමෙරිකානු ජනාධිපතිවරණයට තමන් සහභාගීවන බව ජෝ බයිඩ්න් ඊයේ නිවේදනය කරනු ලැබුවා.
