ඇලිස් ස්ප්‍රිංග්ස් නගරයට පණවා ඇති ඇල්කොහොල් තහනම තවත් මාස 03 කට දීර්ඝ කර තිබෙනවා.
නගරයේ ප්‍රචණ්ඩ ක්‍රියා ඉහළයාමත් සමග පසුගිය ජනවාරි මාසයේයි පළමු වරට මෙම තහණම පණවනු ලැබුවේ.
එහි සාර්ථකත්වය මත තවත් මාස 03 කට මෙම වාරණය දීර්ඝ කරන බවයි Northern Territory ප්‍රධාන අමාත්‍ය නටාෂා ෆයිල්ස් සඳහන් කලේ.
පසුගිය සතියේ නිකුත් වූ වාර්තාවක දැක්වුණේ මත්පැන් පානය සම්බන්ධ ගැටුම් මත ඇලිස් ස්ප්‍රිංග්ස් නගරයේ රෝහල් වෙත ඇතුළත් කරන පුද්ගලයන් සංඛ්‍යාවද ඇල්කොහොල් සීමා හමුවේ අඩකින් පමණ අඩුවී ඇති බවයි.
ඒ අනුව සඳුදා සහ අගහරුවාදා දිනවල කිසිදු ආකාරයකින් මත්පැන් අලෙවි කල නොහැකි අතර අනෙකුත් දිනවල අලෙවිය පස්වරු 03 සිට රාත්‍රී 07 දක්වා පමණක් සීමා වනු ඇති.
එමෙන්ම එක් පුද්ගලයෙකුට දිනයක් තුළදී මත්පැන් මිළයට ගත හැකි වන්නේද එක් අවස්ථාවකදී පමණයි.
