උසස් අධ්‍යාපනය හදාරන සිසුන් විසින් ලබාගෙන ඇති ඩොලර් බිලියන 74 ක වටිනාකමින් යුත් ශිෂ්‍ය ණය කපා හැරීමේ යෝජනාවක් ලබන සතියේදී ෆෙඩරල් පාර්ලිමේන්තුවට ඉදිරිපත් කිරීමට නියමිතයි.
ග්‍රීන්ස් පක්ෂය විසින් මෙම යෝජනාව ඉදිරිපත් කරනු ලබන්නේ ශිෂ්‍ය ණ්‍ය පොළිය ඉහළ දැමීමට සූදානම් වන වාතාවරණයකදී වීමද විශේෂත්වයක්.
දැනට උපාධි අධ්‍යාපනයක් හදාරන සිසුන් මිලියන 03 කට ආසන්න පිරිසකට ඔවුන්ගේ ශිෂ්‍ය ණය සියයට 07 කින් පමණ වැඩිවනු ඇති බවටයි වාර්තා පළවන්නේ.
ඊට අදාළ තහවුරු කරන ලද පොළී අනුපාතිකය ෆෙඩරල් රජය විසින් නිල වශයෙන් නිවේදනය කිරීමට නියමිතව ඇත්තේ ලබන 26 වනදායි.
මෙවර ජූනි මාසයේදී ශිෂ්‍ය ණය සියයට 07 කින් පමණ ඉහළ යනු ඇති බවත්, ඒ අනුව දැනට ඩොලර් 25,000 ක පමණ ණය මුදලක් ගෙන ඇති අයෙකුගේ සමස්ත ණය ප්‍රමාණය ඩොලර් 1,500 කින් පමණ වැඩිවනු ඇති බවටත් තක්සේරු කර තිබෙනවා.
ශිෂ්‍ය ණය සඳහා ක්‍රෙඩිට් කාඩ් හෝ නිවාස ණය සඳහා වැනි ඉහළ පොළියක් බලාත්මක නොවුවද කුමන හෝ අගයකින් පොළිය ඉහළයාම ශිෂ්‍ය ණය හිමියන්ට දැඩි ගැටලූවක් වනු ඇති බවටයි අනාවැකි පළවන්නේ.
මෙහි වැඩිම බලපෑම එල්ලවනු ඇත්තේ කිසිදු රැකියාවක නිරත නොවන සිසුන්ට බව ද සඳහන්.
