අනාගත සයිබර් ප්‍රහාර වළක්වාලීම සඳහා සියලුම ප්‍රධාන බැංකු සහ මූල්‍ය ආයතන ඒකාබද්ධ කරගත් පොදු ප්‍රතිචාර දැක්විම් ක්‍රමයක් සකස් කිරීමට ෆෙඩරල් රජය අවධානය යොමු කර තිබෙනවා.
ඔප්ටස් – මෙඩිබෑන්ක් සහ ලැටිටියුඩ් ෆයිනෑන්ෂල් යන ආයතන වෙත එල්ලවූ සයිබර් ප්‍රහාර සළකා මෙම පියවර ගන්නා බවයි සයිබර් ආරක්ෂණ ඇමතිනී ක්ලෙයාර් ඔ-නිල් සඳහන් කරන්නේ.
මෙම සයිබර් ප්‍රහාර හමුවෙි සෑම ඔස්ට්‍රේලියානු පවුලකම අවම වශයෙන් එක් අයෙකු හෝ බලපෑමට ලක්ව ඇති බව සඳහන්.
ඒ අනුව දැනටමත් මිලියන ගණනකට බලපෑම් එල්ලවී ඇති බැවින් ඉදිරියේදී එවැනි තත්වයන් ඇතිවීම වළක්වාලීම මෙහි අරමුණ වී තිබෙනවා.
පසුගිය ස්කොට් මොරිසන් රජය විසින් ප්‍රකාශයට පත්කර තිබූ ඩොලර් බිලියන 1.7 ක වටිනාකමින් යුත් සයිබර් ආරක්ෂණ වැඩපිළිවෙල පූර්ණ වෙනසකට ලක් කරන බවයි පසුගිය පෙබරවාරි මාසයේදී වත්මන් ලේබර් පක්ෂ රජය නිවේදනය කලේ.
එමෙන්ම ඔස්ට්‍රේලියාවේ සයිබර් ආරක්ෂණ නීති ද පූර්ණ වෙනසකට ලක් කරන බව වැඩිදුරටත් ප්‍රකාශ කෙරුණා.
