ජීවන වියදම සීඝ්‍රයෙන් ඉහළයාම හමුවේ ඔස්ට්‍රේලියාවේ වැඩිහිටි ජනගහණයෙන් සියයට 80 ක් පමණ දැඩි පීඩනයකට ලක්ව ඇතැයි නවතම සමීක්ෂණයකදී අනාවරණ වී තිබෙනවා.
ඉදිරි මාස 12 තුළදී මෙම අගය තවත් ඉහළ යා හැකි බවටයි අනතුරු ඇගවෙන්නේ.
සමස්ත ඔස්ට්‍රේලියාවම ආවරණය වන පරිදි තෝරාගත් වයස අවුරුදු 50 ට වැඩි පුද්ගලයන් 5,700 දෙනෙකු ආශ්‍රිතව ලබාගත් තොරතුරු මගින් මෙම වාර්තාව එළි දක්වා තිබෙනවා.
ආහාර මිළ – ඉන්ධන ඇතුලු බලශක්ති ගාස්තු සහ සෞඛ්‍ය වියදම් ප්‍රධාන ගැටලු ලෙස මෙහිදී හඳුනාගෙන ඇති අතර නිවාස ප්‍රශ්නයද අවධානය යොමුකල යුතු කරුණක් ලෙසයි සමීක්ෂණයට දායකවුවන් විසින් පෙන්වා දී ඇත්තේ.
දුෂ්කර ප්‍රදේශවල වාසය කරන ජනතාව සහ අඩු ආදායම්ලාභින් මෙහි වැඩිම බලපෑම එල්ල වී ඇති පිරිස බවට හඳුනාගෙන තිබෙනවා.
දැනට මාර්තු සහ සැප්තැම්බර් වලදී සිදුකරන විශ්‍රාම වැටුප් ඉහළ දැමීම් වෙනුවට කාර්තුවකට වරක් එනම් වසරකට අවස්ථා 04 කදී එය සිදුකල යුතු බවටයි මෙම වාර්තාව නිර්දේශ කර ඇත්තේ.
