ශ්‍රී ලංකාවේ ජ්‍යෙෂ්ඨ සංගීතඥයෙකු වන සංගීත් නිපුන් සනත් නන්දසිරි අභාවප්‍රාප්ත වී තිබෙනවා.
කොළඹ පුද්ගලික රෝහලක ප්‍රතිකාර ලබමින් සිටියදී අද අලුයම මිය යන විට ඔහුගේ වයස අවුරුදු 81 ක්.
“ඇවුළුණු ගිනි දැල් නිවි නිවි යද්දී ” ගීතය ගයමින් සනත් නන්දසිරි සූරීන් ජනප්‍රියතාවයකට හා රසික ප්‍රසාදයකට පාත්‍ර විය.
ඉතා ශූර තබ්ලා වාදකයකු වශයෙන් තම සංගීත දිවිය ඇරඹි සනත් නන්දසිරි සූරීන් අමරදේවයන්ගෙන් බොහෝ දේ උගත්තේය.
ඉන් පසු ඉන්දියාවේ ලක්නව් නුවර ශාන්ති නිකේතනයට ගොස් තම හැකියාවන්‍ වැඩි දියුණු කොට ගායනයෙන් හ වාදනයෙන් අගතැන්පත් වී විශාරදයෙකු බවට පත් විය.
” මම නම් ආසයි අහන්න නයනා”, “.මා හද අසපුව”, ” මේ ප්‍රථම වසන්තයයි”, ” හිච්චි නඟේ”, ” මුළු ලොව මගෙන් අසාවී”, ” විකසිත වත කමලේ”, ” ශීත රෑ වසන්තෙ”, ” ඈත එපිට ගම්මානෙන් නැඟ එන”, “එක යායට මල් පීදුණු බිම් තීරේ”, ” ආදර සැමරුම්”, ” වාසනා වේවා “, ” පෙමාතුර හැඟුම්”, ” දේදුන්නෙන් එන”, ” සඳලු තලේ හිඳ”, ” ආදරේ නෑ ආදරේ කවුරුවත් නෑ ආදරේ”,” දිනෙන් දින”, ” සමුගන්නදෝ ආයෙ හමුවන්නදෝ”, “මහද පෙම් විලේ”, කිසිවක් නොකියන”, ” මහද වීණා”, ” තුන් මං හන්දිය”, ” ඇගෙ සුවඳ පිරුණු පුංචි කාමරෙ”, ” වරඳක් කළත් සිතකින් නොවේ”, ” ගීතා දයාබර ගීතා” , ” දඟකාර ඔය දෑස දුටුවා එදා” වැනි අතිශය ජනප්‍රිය ප්‍රේම ගීත මෙන්ම ” ශීත රෑ යමේ අඳුරෙ” ගීතය, විස්මය චිත්‍රපටයට ගැයූ ” ලස්සන නම් නෑ පෙනෙන්නේ”, ධර්මසේන පතිරාජයන්ගේ ” අහස් ගව්ව” චිත්‍රපටයට ගැයූ ” එන්න මගේ ප්‍රිය මිතුරෝ” ගීතය ඇතුළු බෙහෝ ගීත ගණනාවක්ම එතුමන් ගායනා කළේය. සංගීතවත් කළේය.
