ෆෙඩරල් රජයේ නිවාස අරමුදල සඳහා වෙන්කර ඇති මුදල ඉහළ දැමීමට මෙතෙක් පියවර ගෙන නොමැති බවට චෝදනා එල්ල වනවා.
වසරකට ඩොලර් මිලියන 500 ක් බැගින් වෙන් කරමින් ක්‍රියාත්මක ඩොලර් බිලියන 10 ක මෙම අරමුදල හරහා නව සමාජ ආරක්ෂණ නිවාස ඉදි කිරීමට සහ ස්වදේශික ජනතාවගේ නිවාස වැඩි දියුණු කිරීමට නියමිතයි.
පළමු වසර 05 තුළදී එලෙස ඉදි කිරීමට යෝජනා වී ඇති නිවාස ගණන 20,000 ක්.
ඉන් නිවාස 4,000 ක් ගෘහස්ථ ප්‍රචණ්ඩත්වය හමුවේ පීඩාවට පත් කාන්තාවන් සඳහාද – තවත් 10,000 ක් ඉදිරිපෙළ සේවකයන් සඳහාද වෙන් කිරීමට නියමිතයි.
කෙසේවෙතත් මෙම ප්‍රතිපාදන ප්‍රමාණවත් නොවන බවත් රජයේ ඉලක්කය සාර්ථක නොවනු ඇති බවත් ස්වාධීන මන්ත්‍රීන් අවධාරණය කරනවා.
මේ පිළිබඳව අවස්ථා ගණනාවකදී ෆෙඩරල් රජය දැනුවත් කෙරුණද සතුටුදායක පිළිතුරක් නොමැතිවීම මත එම යෝජනාවට සහය දිය නොහැකි බවයි ඔවුන් සඳහන් කරන්නේ.
