ඔස්ට්‍රේලියානුවන් ලක්ෂ 03 කගේ පමණ පුද්ගලික දත්ත පැහැරගැනීමේ සිදුවීමකට සම්බන්ධ නැතැයි ෆේස්බුක් සමාජ ජාලය සහ එහි වත්මන් හිමිකාරීත්වය දරන මෙටා සමාගම ගොණුකල අභියාචනයක් මහාධිකරණය විසින් ඉවත දමා තිබෙනවා.
ඒ අනුව අදාළ නඩු විභාගය ෆෙඩරල් අධිකරණයක් හමුවේ අඛණ්ඩව විභාග කිරීමටයි අවසර ලැබී ඇත්තේ.
2014 වසරේදී ෆේස්බුක් සමාජ ජාලය තුළ පළකරන ලද මත විමසුමකදී මෙම දත්ත සොරාගෙන ඇති බව සඳහන්.
කෙසේවෙතත් ඒ පිළිබඳ පළමුවෙන් තොරතුරු වාර්තා වූයේ 2018 වසරේදීයි.
ඒ වනතෙක් ගතවූ වසර 04 ක කාලය තුළදී අදාළ දත්ත ඔස්ට්‍රේලියානුවන්ගේ අනුදැනුමකින් තොරව විවිධ දේශපාලන සහ වාණිජ කටයුතු සඳහා යොදාගෙන ඇති බවටයි චෝදනා එල්ල වන්නේ.
2016 වසරේදී පැවති අමෙරිකානු ජනාධිපතිවරණයේදි ඩොනල්ඩ් ට්‍රම්ප් ගේ ජයග්‍රහණයට උපාය මාර්ග සකස් කිරීමේදී පවා මෙම දත්ත යොදාගෙන ඇති බව සඳහන්.
කිසියම් අයුරකින් ෆේස්බුක් සමාගම මෙහිදී වරදකරුවන් බවට පත්වුවහොත් ඔස්ට්‍රේලියා ඩොලර් මිලියන 2.2 ක දඩයකට ඔවුන් යටත් වනු ඇති.
