නිවු සවුත් වේල්ස් ප්‍රාන්තයේ මාර්ග ගාස්තු නැවත ගෙවීමේ ක්‍රමවේදය යටතේ ප්‍රාන්ත රජය විසින් රියදුරන් වෙත ඩොලර් මිලියන 23 කට වැඩි මුදලක් ගෙවා අවසන් කර තිබෙනවා.
වසරකට ඩොලර් 375 කට වැඩි මුදලක් ගෙවා ඇති රියදුරන්ට ඔවුන් ගෙවා ඇති සමස්ත මාර්ග ගාස්තුවලින් සියයට 40 ක මුදලක් මේ යටතේ නැවත ලබාගත හැකියි.
කෙසේවෙතත් වසරකදී එලෙස ලබාගත හැකි උපරිම මුදල ඩොලර් 750 ක්.
මේ දක්වා රියදුරන් 61,000 කට අධික පිරිසක් මාර්ග ගාස්තු නැවත ලබාගෙන ඇති බවයි නිවු සවුත් වේල්ස් ප්‍රාන්ත රජය සඳහන් කලේ.
ලබන 28 වනදා සිට ඉදි කිරීම් සේවකයන්ටද වාහන 02 ක උපරිමයකට යටත්ව මාර්ග ගාස්තු නැවත ලබාගැනීමට මෙහිදී අවස්ථාව පවතිනවා.
ලබන මස පැවැත්වෙන නිවු සවුත් වේල්ස් ප්‍රාන්ත මැතිවරණයේදී ලේබර් පක්ෂය ජයගතහොත් මාර්ග ගාස්තුවලින් සතියකට ඩොලර් 60 ක උපරිමයක් දක්වා යළි ලබාගැනීමේ ක්‍රමවේදයක් හඳුන්වාදිමට යෝජිතයි.
