Australia Day දිනයේදී නීති විරෝධි අයුරින් ගිණි කෙළි සංදර්ශන පවත්වන්නන්ට එරෙහිව නීතිය දැඩිව ක්‍රියාත්මක කරන බවට නිවු සවුත් වේල්ස් ප්‍රාන්ත රජය අනතුරු අගවනවා.
බලපත්‍රයක් රහිතව එවැනි ක්‍රියාවල නිරත වන ඕනෑම අයෙකුට පවතින නීතිය අනුව පියවර ගන්නා බවටයි ඔවුන් දන්වා සිටින්නේ.
නව අවුරුදු උදාවේදීත් සිඩ්නි නගරයේ ඇතැමුන් මෙවැනි නීති විරෝධී ක්‍රියාවල නිරත වී ඇති බවට තොරතුරු ලැබී ඇතැයි ප්‍රාන්ත රජය සඳහන් කලා.
නිවු සවුත් වේල්ස් හි පවතින නීතියට අනුව නිසි අවසරයකින් තොරව ගිණි කෙළි භාවිත කරන – අලෙවි කරන – මිළදී ගන්නා – ගබඩා කර තබන හෝ ප්‍රවාහනය කරන අයෙකුට ඩොලර් 27,500 ක දඩයක් සහ මාස 12 ක සිර දඩුවමක් නියම කල හැකියි.
නිසි ප්‍රමිතියකින් තොර සහ පුහුණුවකින් තොරව ගිණි කෙළි භාවිත කලහොත් දැවැන්ත විනාශයක් සිදුවිය හැකි බවයි නිවු සවුත් වේල්ස් ප්‍රාන්ත රජය අවධාරණය කරන්නේ.
