නිවාසවල කුළියට සිටින්නන්ගේ සුරතල් සතුන් සම්බන්ධ නීති සංශෝධනය කිරීම කෙරෙහි නිවු සවුත් වේල්ස් ප්‍රාන්ත කම්කරු පක්ෂයේ අවධානය යොමුවී තිබෙනවා.
ලබන මාර්තු මාසයේ පැවැත්වෙන ප්‍රාන්ත ඡන්ද විමසීමේදී ජය ගත හොත් එම නව නීති ක්‍රියාවට නංවන බවයි ඔවුන් සඳහන් කර සිටින්නේ.
දැනට පවතින නීති යටතේ කුළියට නිවාසවල සිටින්නන් විසින් සුරතල් සතුන් ගෙන එන්නේ නම් ඒ සඳහා නිවාස හිමිකරු විසින් අවසර දිය යුතු අතර කිසිදු හේතු විමසීමකින් තොරව එම ඉල්ලීම් ප්‍රතික්ෂේප කල හැකියි.
කම්කරු පක්ෂය විසින් එම රෙගුලාසි සංශෝධනය කිරීමට අපේක්ෂා කරන අතර එවැනි ඉල්ලීමක් ලැබුණහොත් දින 21 ක් ඇතුළත සළකා බලා අවසන් තීරණයක් දිය යුතු වනවා.
කිසියම් අයුරකින් ප්‍රතික්ෂේප කිරීමක් සිදුකල හොත් ඒ සඳහා බලපෑ හේතුන් ද නිවාස හිමිකරු විසින් පැහැදිලිව දැක්විය යුතු බවයි නිවු සවුත් වේල්ස් කම්කරු පක්ෂය සඳහන් කර සිටින්නේ.
දැනට නිවු සවුත් වේල්ස් ප්‍රාන්තයේ නිවාස කුළියට සිටින පිරිස අතුරින් මිලියන 02 ක් පමණ සුරතල් සතුන් ඇති කරන්නන් බවයි අනාවරණ වී ඇත්තේ.
