නත්තල් නිවාඩු සමයේ ගුවන් ගමන් ගාස්තු සම්බන්ධයෙන් දැඩිව නිරීක්ෂණය කිරීමට ජාතික පාරිභෝගික කොමිසම තීරණය කර තිබෙනවා.
ඒ ප්‍රමාණවත් ආසන ධාරිතාවයක් පවත්වාගැනීමෙන් තොරව ගුවන් ප්‍රවේශපත්‍ර ගාස්තු ඉහළ දමන බවට චෝදනා එල්ලවීමත් සමගයි.
විශේෂයෙන් අභ්‍යන්තර ගුවන් ගමන්වලදී මෙම තත්වය වැඩි වශයෙන් දක්නට ලැබෙන බවටයි හඳුනාගෙන ඇත්තේ.
ගුවන් මාර්ග 10 ක් සළකා බැලීමේදී 2019 වසරේ පැවති ගුවන් ගමන් ගාස්තුවලට සාපේක්ෂව දෙගුණයකටත් වඩා ගාස්තු ඉහළ දමා ඇති බවයි පාරිභෝගික කොමිසම පෙන්වා දෙන්නේ.
මෙල්බන් සිට පර්ත් දක්වා ආපසු ගුවන් ගමනකට ඩොලර් 439 ක් ලෙස පැවති ගාස්තුව මේ වනවිට ඩොලර් 1078 ක් දක්වා ඉහළ ගොස් තිබෙනවා.
ඇඩිලේඩ් සිට ගෝල්ඩ් කෝස්ට් දක්වා ඩොලර් 374 ක් ලෙස පැවති ගාස්තුව ඉහළ ගොස් ඇත්තේ ඩොලර් 958 ක් දක්වායි.
කෙසේවෙතත් ක්වන්ටාස් සහ වර්ජින් ගුවන් සමාගම් පවසන්නේ ඉදිරි මාස 06 තුළදී ගුවන් ගාස්තු අඩුවනු ඇති බවයි.
සේවක හිගය හමුවේ උපරිම ධාරිතාවයෙන් ගුවන් ගමන් ක්‍රියාත්මක කල නොහැකි බවයි ඔවුන් සඳහන් කර සිටින්නේ.
