අන්තර්ජාල වේග සම්බන්ධයෙන් පාරිභෝගිකයන් නොමග යැවීමේ චෝදනා මත ඔස්ටේ්‍රලියාවේ ප්‍රධානතම විදුලි සංදේශ සමාගම වන Telstra ට එරෙහිව නඩු පැවරීමට ජාතික පාරිභෝගික කොමිසම තීරණය කර තිබෙනවා.
2020 ඔක්තෝබර් සහ නොවැම්බර් කාලවලදී අන්තර්ජාල වේගයක් සහිත පැකේජයක් භාවිත කරමින් සිටි පාරිභෝගිකයන් 9000 ක් පමණ වෙනත් පැකේජයකට යොමු කරවීමටයි Telstra විසින් පියවර ගෙන ඇත්තේ.
කෙසේවෙතත් පොරොන්දු වූ ඉහළ අන්තර්ජාල වේගය ලබාදීමට හෝ ගාස්තු අඩු කිරීමකට ඔවුන් කටයුතු කර නොමැති බවට පාරිභෝගිකයන් විසින් ඉදිරිපත් කල චෝදනා සැළකිල්ලට ගෙනයි පාරිභෝගික කොමිසම විසින් මෙම අධිකරණ කටයුත්ත ආරම්භ කිරීමට තීරණය කරනු ලැබුවේ.
අදාළ පාරිභෝගිකයන් අතුරින් 2500 කට පමණ පසුගිය අප්‍රේල් මාසයේදී ගාස්තු සහනයක් ලැබී ඇතත් වැඩි පිරිසකට මේ දක්වා සාධාරණයක් ඉෂ්ට වී නැතැයි සඳහන්.
මෙම සියලු කරුණු අධිකරණයේදී සාධක සහිතව ඔප්පු කරන බවටත් පාරිභෝගික කොමිසම අවධාරණය කර තිබෙනවා.
