child care සහනාධාරය ඉහළ දැමීමත් සමග නැවත ශ්‍රම බලකායට එක්වන ඔස්ටේ්‍රලියානුවන්ගේ සංඛ්‍යාව ඉහළ යනු ඇති බවට අනාවැකි පළවනවා.
දළ වශයෙන් පවුල් ලක්ෂ 12 කට පමණ මෙමගින් සහන හිමිවනු ඇති බවටයි තක්සේරු කර ඇත්තේ.
ඒ අනුව ආසන්න වශයෙන් පුද්ගලයන් 38,500 ක් පමණ යළි රැකියා සඳහා සම්බන්ධ වනු ඇති බව සඳහන්.
නව child care නීති පෙරේදා දිනයේදී පාර්ලිමේන්තුවේදී සම්මත වුණා.
මේ අනුව ඩොලර් 80,000 ට අඩු ආදායම් ලබන පවුල් සඳහා ලබන වසරේ ජූලි මාසයේ සිට child care සහනාධාරය සියයට 85 සිට සියයට 90 දක්වා ඉහළ දැමෙනු ඇති.
ආදායම වැඩිවන සෑම ඩොලර් 5000 ක් සඳහාම child care සහනය සියයට 01 බැගින් අඩුවන අතර ඩොලර් 530,000 ක් හෝ ඊට වැඩි ආදායමක් ලබන පවුල් සඳහා සහනාධාරයක් හිමිවන්නේ නැහැ.
ඩොලර් 120,000 ක ආදායමක් ලබන පවුලකට දැනට හිමිවන child care සහනාධාරය සියයට 71 ක් වන අතර ලබන ජූලි මාසයේ සිට එය සියයට 82 දක්වා ඉහළ යාමට නියමිතයි.
පසුගිය මැතිවරණ සමයේදී ලේබර් පක්ෂය ලබාදුන් මැතිවරණ පොරොන්දුවක් අනුවයි මෙම නීති සම්මත කර ගැණුනේ.
child care ගාස්තු නියාමනයට පාරිභෝගික කොමිසමට වැඩි බලතල හිමිවීමද නව නීති අතර වනවා.
