කාන්තාවකට ලිංගික අතවර කිරීමේ චෝදනාව යටතේ ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලක සිඩ්නි නුවරදී අත්අඩංගුවට ගැනීම ඔස්ටේ්‍රලියානු මාධ්‍ය ආයතන ගණනාවක් විසින්ද වාර්තා කර තිබෙනවා.
ABC සහ The Australian වැනි ප්‍රමුඛතම මාධ්‍ය පවා මෙම සිදුවීම වාර්තා කර තිබීම විශේෂත්වයක්.
ධනුෂ්ක ගුණතිලකට එරෙහිව ඔස්ටේ්‍රලියානු නීතිය යටතේ චෝදනා 04ක් ගොනු කර ඇති අතර ඔහුට පොලිස් ඇප ලබාදීම ද ප්‍රතික්ෂේප කර තිබෙන බවයි වැඩිදුරටත් වාර්තා වන්නේ.
ඒ අනුව ඔහු අද සිඩ්නි අධිකරණයකට ඉදිරිපත් කිරීමට නියමිතයි.
සිඩ්නි වේලාවෙන් අද අලූයම 1.00 ට පමණ ශ්‍රී ලංකා කණ්ඩායම රැඳී සිටි හෝටලය තුලදී ධනුෂ්ක ගුණතිලක අත්අඩංගුවට ගනු ලැබූවා.
29 හැවිරිදි කාන්තාවක සමග ඔන්ලයින් යෙදුමක් (Dating App) හරහා දින ගණනාවක සිට ඔහු පණිවිඩ හුවමාරු කර ගෙන තිබෙන අතර පසුව ඔහු එම කාන්තාව ගේ නිවසට ගොස් ඇයව මුණගැසී ඇති බවයි සිද්ධිය සම්බන්ධයෙන් පරීක්ෂණ සිදුකරනු ලබන පොලිස් නිලධාරීන් උපුටා දක්වමින් මාධ්‍ය වාර්තා කර සිටින්නේ.
එහිදී ධනුෂ්ක ගුණතිලක විසින් අදාළ කාන්තාව ලිංගික අතවරයකට පත්කර ඇති බවට ඇය විසින් පොලිසියට පැමිණිලි කොට ඇති අතර පසුව ඒ සම්බන්ධයෙන් පරීක්ෂණ ආරම්භ කර තිබෙනවා.
අපරාධය සිදුවූ බව කියන නැගෙනහිර සිඩ්නි නුවර පිහිටි අදාළ කාන්තාවගේ නිවස ද පොලිසිය විසින් මේ වන විට පරීක්ෂා කර ඇති බව සඳහන්.
