නිවු සවුත් වේල්ස් ප්‍රාන්තයේ TAFE පාසල් 60 කට වැඩි සංඛ්‍යාවක ගුරුවරුන් අද දිනයේදී පැය 24 ක වර්ජනයක් ආරම්භ කර තිබෙනවා.
ඒ වැටුප් ඉහළ දැමීම ඇතුලු ඉල්ලීම් කිහිපයක් මුල් කර ගනිමිනුයි.
ප්‍රාන්තයේ නාගරික – ප්‍රාදේශීය සහ ග්‍රාමීය ප්‍රදේශවල පාසල් නියෝජනය වන පරිදි ගුරුවරුන් මෙම වර්ජනයට එක්ව සිටින බව සඳහන්.
පසුගිය වසර 10 පුරා නිවු සවුත් වේල්ස් ප්‍රාන්ත රජය විසින් පාසල් වෙනුවෙන් ලබාදී ඇති ප්‍රතිපාදන කප්පාදු කර ඇති බවටයි ඔවුන් චෝදනා කරන්නේ.
2012 වසරේදී TAFE NSW විසින් ගුරුවරුන් හා අධ්‍යයන කාර්ය මණ්ඩලය 17,000 ක් පවත්වාගෙන ගියද මේ වනවිට එය 8197 ක් දක්වා අඩුවී ඇති බවත් ඔවුන් පෙන්වා දෙනවා.
ගුරුවරුන් සංඛ්‍යාව අඩුවීමෙන් එක් ගුරුවරයෙකු මත පැටවෙන වැඩ ප්‍රමාණය ද වැඩිවන බවයි වර්ජනයට එක්ව සිටින ගුරුවරුන් සඳහන් කරන්නේ.
එමෙන්ම ඉහළ යන ජීවන වියදමට සාපේක්ෂව TAFE ගුරුවරුන්ගේ වැටුප ඉහළ ගොස් නොමැති බවද ඔවුන් අවධාරණය කරනවා.
