ඔප්ටස් සයිබර් ප්‍රහාරය හමුවේ බලපෑම් එල්ල වූ වික්ටෝරියානුවන් ලක්ෂ 10 කට අලුතින් රියදුරු බලපත් කාඩ්පතක් නිකුත් කිරීමට VicRoads තීරණය කර තිබෙනවා.
ඒ අනුව අදාළ කාඩ්පත්වල පිටුපස නව ආරක්ෂණ අංකයක් මුද්‍රණය කිරීමට නියමිත බවයි සඳහන් කලේ.
එය ක්‍රෙඩිට් හෝ ඩෙබිට් කාඩ්වල පිටුපස ඇති CVV අංකය හා සමාන එකක් වනු ඇති.
මෙම නව බලපත්‍රය මෙන්ම දැනට වික්ටෝරියා රියදුරන් භාවිත කරන රියදුරු බලපත්‍රයද යොදාගනිමින් බැංකු ගිණුම් විවෘත කිරීමට – ණය ඉල්ලුම් කිරීමට සහ වෙනත් එවැනි ඕනෑම කාර්යයක් සිදුකල හැකියි.
ඔප්ටස් වංචාව හමුවේ වික්ටෝරියා ප්‍රාන්තයේ රියදුරු බලපත්‍ර 942,000 ක පමණ පුද්ගලික දත්ත සොරාගැනීමට ලක්ව ඇතැයි ස්වදේශ කටයුතු දෙපාර්තමේන්තුව විසින් තහවුරු කර තිබෙනවා.
342,000 කට පමණ මෙම වසර අවසන්වීමට පෙර නව රියදුරු බලපත් කාඩ්පත නිකුත් කෙරෙන අතර ඉතිරි 600,000 ට ලබන වසරේ මුල් කාර්තුව වනවිට එය ලබාදීමට පියවර ගෙන ඇතැයි VicRoads කියාසිටියා.
මේ අතර ලබන වසරේ නොවැම්බර් මාසයේ සිට වික්ටෝරියා ප්‍රාන්තයේ ලක්ෂ 50 කට ආසන්න සියලුම රියදුරන් සඳහා නව කාඩ්පත නිකුත් කිරීම ආරම්භ කරන බවද VicRoads සඳහන් කරනවා.
