ලබන මස 26 වනදා පැවැත්වෙන වික්ටෝරියා ප්රාන්ත මැතිවරණයේදී ඡන්දය භාවිත කිරීමට තීරණය කර ඇති පුද්ගලයන් ලබන 08 වනදා වනවිට සිය තොරතුරු යාවත්කාලීන කල යුතු බව වික්ටෝරියා මැතිවරණ කොමිසම දැනුම් දෙනවා.
අනතුරුව ඔවුන් ඡන්දය ප්රකාශ කරන ආකාරය පිළිබඳ තීන්දුවක් ගත යුතුව ඇති බවයි කොමිසම දන්වා සිටින්නේ.
ඡන්දය ප්රකාශ කල හැකි ක්රම 03 ක් පවතින අතර තැපෑලෙන් ඡන්දය භාවිත කිරීමට හෝ මැතිවරණ දිනයේදී පෙරවරු 08 ත් පස්වරු 06 ත් අතර ඡන්ද මධ්යස්ථානයකට ගොස් ඡන්දය ප්රකාශ කිරීමට ඒ අනුව අවස්ථාව පවතිනවා.
එසේ නොමැතිනම් නොවැම්බර් 14 වනදා සිට 25 වනදා දක්වා ඕනෑම දිනයකදී පූර්ව ඡන්ද මධ්යස්ථානයක් වෙත ගොස් ඡන්දය ප්රකාශ කිරීමටද හැකියි.
කිසියම් ආකාරයකින් තැපැල් ඡන්ද ප්රකාශ කිරීමට අපේක්ෂා කරන්නේ නම් ඊට අදාළ අයදුම්පත් ලබන 02 වනදා සිට 23 වනදා අතර කාලයේදී ඉදිරිපත් කල යුතු වනවා.
ජල ගැලීම්වලට ලක්වු ප්රදේශයක ඡන්ද දායකයෙකුට දුරකථනය ඔස්සේ ඡන්දය ප්රකාශ කල හැකි අතර නොවැම්බර් 26 වනදා වනවිට වෙනත් ප්රාන්තයක සිටින හෝ වෙනත් රටක සිටීමට සිදුවන වික්ටෝරියා ප්රාන්තවාසියෙකුට කලින් ඡන්දය දීමට හෝ වෙනත් ප්රාන්තයක සිට ඡන්දය දීමට අවස්ථාව සළසා දෙන බව වික්ටෝරියා මැතිවරණ කොමිසම දැනුම් දෙනවා.
ෆෙඩරල් මැතිවරණයකදී මෙන්ම වික්ටෝරියා ප්රාන්ත මැතිවරණයේදීත් ඡන්දය ප්රකාශ කිරීම අනිවාර්ය වන අතර කිසියම් අයෙකු ඒ සඳහා කටයුතු නොකලහොත් දින 28 ක් ඇතුළත ඩොලර් 92 ක දඩයක් ගෙවිය යුතු වනවා.
