ඔප්ටස් සයිබර් ප්‍රහාරයේදී යොදාගත් දත්ත ආශ්‍රිතව SMS වංචාවක් සිදුකල බව කියන සිඩ්නි පදිංචිකරුවෙකු ඔස්ටේ්‍රලියානු ෆෙඩරල් පොලිසිය විසින් අත්අඩංගුවට ගෙන තිබෙනවා.
ඔස්ටේ්‍රලියානු ෆෙඩරල් පොලිසිය විසින් Operation Guardian ලෙස නම්කල විශේෂ මෙහෙයුමේදීයි මෙම තැනැත්තා අත්අඩංගුවට ගෙන ඇත්තේ.
මෙම සැකකරු සම්බන්ධයෙන් වැඩදුර තොරතුරු ඉදිරියේදී ප්‍රකාශයට පත්කරන බව ඔස්ටේ්‍රලියානු ෆෙඩරල් පොලිසිය සඳහන් කලා.
මේ අතර මිලියන 10 ක පමණ පාරිභෝගිකයන්ට බලපෑම් එල්ල කරමින් ඔප්ටස් සමාගමට එල්ල වූ සයිබර් ප්‍රහාරයත් සමග මෙරට විදුලි සංදේශ ක්ෂේත්‍රයට අදාළ නීති සහ රෙගුලාසි කිහිපයක් සංශෝධනය කිරීමට ෆෙඩරල් රජය තී්රණය කර තිබෙනවා.
ඒ අනුව විදේශ ගමන් බලපත් අංක – රියදුරු බලපත් අංක සහ දත්ත, බැංකු සහ අනෙකුත් මූල්‍ය ආයතන සමග හුවමාරු කරගැනීමට දුරකථන සමාගම් ඇතුලු විදුලි සංදේශ ආයතන සඳහා අවස්ථාව උදාවනවා.
කිසියම් සයිබර් ප්‍රහාරයක් එල්ල වූ අවස්ථාවකදී අදාළ පුද්ගලයන්ගේ බැංකු ගිණුම් ඇතුලු අනෙකුත් සංවේදී තොරතුරු ආරක්ෂා කරගැනීමට ඒ හරහා අමතර ප්‍රතිපාදන ලැබෙනු ඇති.
කිසියම් වංචාවක් සම්බන්ධයෙන් විමර්ශනය කිරිමේදී ෆෙඩරල් රජයේ සහ ප්‍රාන්ත රජයන්හි විමර්ශන අංශ වෙත තොරතුරු ලබාදීමටත් නව රෙගුලාසි හරහා විදුලි සංදේශ සමාගම් වෙත අවස්ථාව හිමිවන බවයි ෆෙඩරල් භාණ්ඩාගාරික අමාත්‍ය ජිම් චාමර්ස් කියාසිටියේ.
තවදුරටත් අවශ්‍ය නොවන පුද්ගලික දත්ත ගබඩා කර ගැනීමකින් තොරව විනාශ කිරීම තවත් යෝජනාවක්.
ඉදිරි මාස 12 සඳහා මෙම නව රෙගුලාසි බලාත්මක වන අතර තවත් දීර්ඝ කරන්නේද යන්න අනතුරුව විමසා බැලීමට නියමිතව තිබෙනවා.
මෙම රෙගුලාසි බලාත්මක කිරීමට පෙර නීතිපතිවරයාගේ අනුමැතිය හිමිවිය යුතු බවත් ෆෙඩරල් භාණ්ඩාගාරිකවරයා සඳහන් කලා.
