ඔප්ටස් සමාගමට එල්ල වු දැවැන්ත සයිබර් ප්‍රහාරයේදී සොරාගත් පාරිභෝගිකයන්ගේ පුද්ගලික දත්ත අතුරින් 10,000 කගේ පමණ තොරතුරු දැනටමත් ප්‍රසිද්ධියට පත් කර ඇතැයි සයිබර් ආරක්ෂණ විද්වතුන් පවසනවා.
එමෙන්ම තමන්ට අමෙරිකානු ඩොලර් මිලියනයක කප්පම් මුදලක් නොගෙවන්නේ නම් දිනපතා 10,000 කගේ බැගින් පුද්ගලික දත්ත අන්තර්ජාලයට මුදා හරින බවටයි ඔහු අනතුරු අගවා සිටින්නේ.
මෙම සයිබර් ප්‍රහාරය කණ්ඩායමක් විසින් නොව තනි පුද්ගලයෙකු විසින් සිදුකර ඇති බවට දැනට තොරතුරු පවතින බවත් විද්වතුන් සඳහන් කරනවා.
බොහෝවිට උසස් අධ්‍යාපනය හදාරන සිසුවෙකු එය සිදුකරන්නට ඇති බවටත් දැනට පවතින තොරතුරු අනුව විශ්වාස කල හැකි බවයි ඔවුන්ගේ ස්ථාවරය වන්නේ.
මේ අතර දත්ත සොරාගැනීමට ලක්වූ පාරිභෝගිකයන් වෙත ඔප්ටස් සමාගම විසින් එය නිල වශයෙන් දැනුම්දීම ආරම්භ කර තිබෙනවා.
එහි දැක්වෙන්නේ කිසිදු මුරපදයක් (password) හෝ ගිණුම් තොරතුරක් සොරාගැනීමට ලක්ව නොමැති නමුත් නම – උපන්දිනය – විද්‍යුත් ලිපිනය – දුරකථන අංකය වැනි දත්ත පමණක් සොරා ගැනීමට ලක්ව ඇති බවයි.
