එළඹෙන ග්‍රීෂ්ම සෘතුවේදී විදෙස් සංචාර සඳහා යාමට අපේක්ෂා කරන ඔස්ටේ්‍රලියානුවන් සඳහා විදේශ කටයුතු දෙපාර්තමේන්තුව විසින් විශේෂ දැනුම්දීමක් සිදුකර තිබෙනවා.
අලුතින් ගමන් බලපත්‍රයක් අයදුම් කරන්නේ නම් හෝ ගමන් බලපත්‍රය අලුත් කරන්නේ නම් දැන්ම ඒ සඳහා කටයුතු කරන ලෙසයි උපදෙස් දී ඇත්තේ.
දැනටමත් ගමන් බලපත්‍ර සකස් කිරීමේදී දැඩි ප්‍රමාදයන් පැවතීම ඊට හේතුවයි.
සැප්තැම්බර් මාසය ආරම්භය වනවිට දිනකට විදේශ ගමන් බලපත්‍ර අයදුම්පත් 12,000 ක් පමණ ලැබුණද මේ වනවිට එය 15,000 ක් පමණ දක්වා ඉහළ ගොස් ඇතැයි සඳහන්.
කොවිඩ් වසංගතය ආරම්භයට පෙර එය පැවතියේ 7,000 ත් 9,000 ත් අතර අගයකයි.
මෙම මාසයේ මේ දක්වා කාලය තුළ නව විදේශ ගමන් බලපත් අයදුම්පත් 160,000 ක් පමණ ලැබී ඇති අතර නිකුත් කර ඇති ගමන් බලපත් සංඛ්‍යාව ලක්ෂ 02 කට ආසන්නයි.
