මැයි මාසයේ පැවති ෆෙඩරල් මැතිවරණයෙන් ජයගැනීමෙන් පසු පිහිටුවන ලද ඇන්තනී ඇල්බනීස්ගේ අගමැති ධුරයෙන් යුත් ලේබර් පක්ෂ රජයට අදට දින 100 ක් ගතවනවා.
ඒ වෙනුවෙන් අගමැතිවරයා විසින් අද පෙරවරුවේ National Press Club හිදී විශේෂ දේශනයක් පවත්වනු ලැබුවා.
එහිදී වැඩි අවධානයක් යොමු කෙරුණේ ලබන බ්‍රහස්පතින්දා සහ සිකුරාදා කැන්බරා පාර්ලිමේන්තුවේදී පැවැත්වෙන රැකියා සහ කුසලතා සමුලුව පිළිබඳවයි.
නව රැකියා – වැටුප් – පුහුණු ශ්‍රමික හිගය වැනි කරුණු රැසක් කෙරෙහි එහිදී අවධානය යොමු කරන බවයි ඇන්තනී ඇල්බනීස් මෙහිදී කියාසිටියේ.
ඉදිරි සාර්ථක ගමනක් වෙනුවෙන් අවශ්‍ය අඩිතාලම ගතවූ දින 100 තුළදී තැබීමට ලේබර් පක්ෂ රජයට හැකිවූ බව අගමැතිවරයා මෙහිදී ප්‍රකාශ කලා.
කොවිඩ් වසංගතය එළඹීමට පෙර 2020 වසරේ මාර්තුවේ පැවති තත්වයට රට ගෙන යා යුතු බවයි ඇන්තනී ඇල්බනීස් අවධාරණය කලේ.
සියල්ලන්ට සම අයිතිවාසිකම් හිමිවන ඔස්ටේ්‍රලියාවක් බිහි කිරීමට පියවර ගන්නා බවටත් අගමැති ඇන්තනී ඇල්බනීස් සහතික වුණා.
