තනතුරෙන් ඉල්ලා අස්වන්නැයි එල්ලවන බලපෑම් ප්‍රතික්ෂේප කරන බව ක්වන්ටාස් සමාගමේ ප්‍රධාන විධායක නිළධාරී ඇලන් ජොයිස් පවසනවා.
අවම වශයෙන් ලබන වසරේ අවසානය වන තෙක් හෝ මෙම තනතුරේ රැඳී සිටීම අපේක්ෂාව බවයි ඔහු සඳහන් කලේ.
ක්වන්ටාස් සමාගම පසුගිය මාස 12 දී ඩොලර් බිලියන 1.9 ක පාඩුවක් ලබා ඇති අතර සමස්ත කොවිඩ් සමය පුරා ලබා ඇති පාඩුව ඩොලර් බිලියන 7 කට ආසන්න වනවා.
ඒ අනුව තනතුරෙන් ඉල්ලා අස්වන ලෙසයි පාර්ශව කිහිපයකින් ඇලන් ජොයිස්ට බලපෑම් එල්ල වී ඇත්තේ.
මෙය සමස්ත ගුවන් ගමන් කර්මාන්තයට දැඩි පීඩනයක් ගෙන දී ඇති කාලසීමාවක් බවත් ඉන්ධන මිළ ඉහළයාම ඊට ප්‍රධාන හේතුව බවත් ඔහු පෙන්වා දෙනවා.
මේ අතර වියදම් ආවරණය කර ගැනීමේ අරමුණ ඇතිව ජාත්‍යන්තර ගුවන් ගමන් ගාස්තු සියයට 20 කින් සහ දේශීය ගුවන් ගමන් ගාස්තු සියයට 10 කින් වැඩි කිරීමට සිදුවනු ඇති බවටද ක්වන්ටාස් සමාගමේ ප්‍රධාන විධායක නිළධාරී ඇලන් ජොයිස් අනාවැකි පළකරනවා.
