සංචාරක වීසා බලපත්‍ර, රැකියා වීසා බලපත්‍ර බවට පත්කළ හැකි බවට විශ්වාස කරමින් මැලේසියාවට සංක්‍රමණය වන ශ්‍රී ලාංකිකයන් සංඛ්‍යාව වැඩි වෙමින් පවතින බව තැනැත්තන් වෙළෙඳාමට එරෙහි ජාතික කාර්ය සාධක බලකායේ අවධානයට ලක්ව තිබෙනවා.
එවැනි පැමිණීම් හේතුවෙන් මැලේසියානු ආගමන බලධාරීන් සංචාර වීසා බලපත්‍රලාභීන් දැඩි ලෙස පරීක්‍ෂා කිරීමට පියවර ගනිමින් සිටින බව සඳහන්.
මෙලෙස ශ්‍රී ලාංකිකයන් සතියකට 20 දෙනෙකු පමණ ගුවන් තොටුපළෙන් සෘජුවම ශ්‍රී ලංකාවට පිටුවහල් කරන බවටයි වාර්තා ලැබී ඇත්තේ.
සංචාරක වීසා මත මැලේසියාවට ඇතුළුවීම අනුමත කර ගැනීමට සමත් වූ බොහෝ පුද්ගලයන්, රැකියා නියෝජිතයින් විසින් තමන් රවටා ඇති බවට පසුව දැනගැනීමට හැකිවී ඇති අතර, ඔවුන්ට සුළු වැටුපක් සහ කම්කරු අයිතිවාසිකම් නොමැතිව දැඩි අමානුෂික තත්වයන් යටතේ සේවය කිරීමට සිදුවීමෙන් මෙලෙස මිනිස් ජාවාරමේ ගොදුරු බවට පත්වන බව සඳහන්.
නීතිවිරෝධී සංක්‍රමණිකයන්ට මැලේසියාවෙන් පිටවීම සඳහා ලබාදී තිබූ පොදු සමා කාලය පසුගිය ජුනි 30 දිනෙන් අවසන් වුණා.
ඒ අනුව වලංගු වීසා බලපත්‍ර නොමැති විදේශිකයන් අත්අඩංගුවට ගැනීම සඳහා මැලේසියානු බළධාරීන් මේ වනවිට අඛණ්ඩ වැටලීම්වල නිරතව සිටිනවා.
වලංගු වීසා බලපත්‍ර නොමැති පුද්ගලයින් අත්අඩංගුවට පත්වූ විට බන්ධනාගාරගත වීමට සිදුවනු ඇති අතර, ඉන් නිදහස් වූ පසු, ඔවුන්ගේ වියදමින් පිටුවහල් කිරීමට කටයුතු කරන තෙක් නියමිත රැඳවුම් මධ්‍යස්ථානයක රැඳී සිටීමට ද සිදුවනවා.
එබැවින් විදෙස්ගත වීමට පෙර ශ්‍රී ලංකා විදේශ සේවා නියුක්ති කාර්යාංශය වෙතින් තහවුරු කර ගන්නා ලෙස කාර්ය සාධක බලකාය දන්වා සිටිනවා.
