ගාලු මුවදොර අරගල භූමියේ හටගත් නොසන්සුන්තාවය අතරතුරදී ආරක්ෂක අංශ සාමාජිකයන් විසින් එහි සිටි විරෝධතාකරුවන් 09 දෙනෙකු අත්අඩංගුවට ගෙන තිබෙනවා.
කොළඹ ජාතික රෝහල සඳහන් කලේ පිරිසක් රෝහල්ගත කර ඇති බවයි.
අද අලුයම 01 යි 30 ට පමණ යුධ හමුදා – ගුවන් හමුදා – පොලිසිය සහ පොලිස් විශේෂ කාර්ය බලකා සාමාජිකයන් විශාල පිරිසක් අරගලභූමියට කඩා වැදී තිබුණා.
එහිදී විරෝධතාකරුවන් සහ කූඩාරම් ඉවත් කිරීමට යාමේදී දැඩි උණුසුම් තත්වයක් හටගෙන තිබුණා.
මාධ්‍යවේදීන් සහ නීතීඥයන් ඇතුලු පිරිසකට මෙහිදී පහරදීමක් සිදුව ඇති බවද සඳහන්.
මේ වනවිට අරගලභූමිය ආරක්ෂක අංශ විසින් වටකර තිබෙනවා.
කෙසේවෙතත් 100 කට ආසන්න පිරිසක් තවමත් එතුළ සිරවී සිටින බවයි වාර්තා වන්නේ.
මේ අතර ගාලු මුවදොර අරගල භූමියට එල්ල වූ ප්‍රහාරය ජාත්‍යන්තර පාර්ශව ගණනාවක් විසින්ද දැඩි ලෙස හෙළා දැක තිබෙනවා.
කොළඹ අමෙරිකානු තානාපතිනි ජුලි චංග් සඳහන් කලේ තුවාලකරුවන්ට වහා වෛද්‍ය ප්‍රතිකාර ලබාදීමට පියවර ගන්නා ලෙසයි.
මේ අතර කොළඹ සිටින බ්‍රිතාන්‍ය මහ කොමසාරිස් සාරා හුල්ටන් සඳහන් කලේ සාමකාමී විරෝධතා සඳහා ඇති අයිතිය අවස්ථා ගණනාවකදී අවධාරණය කර ඇති බවයි.
