ජනාධිපති ගෝඨාභය රාජපක්ෂ මහතාගේ අවසාන ගමනාන්තය සිංගප්පූරුව නොව සවුදි අරාබිය බවට විදෙස් මාධ්‍ය වාර්තා කරනවා.
මාලදිවයිනේ සිට සිංගප්පූරුව දක්වා ඔහු ගමන් කරමින් සිටින්නේ සවුදි අරාබි ගුවන් සේවයට අයත් SV 788 ගුවන් යානයෙනුයි.
එතැන් සිට වෙනත් සවුදි ගුවන් යානයකින් ජෙඩා නුවර දක්වා ගමන් කිරීම ඔහුගේ සැලසුම බවයි නම හෙළිකල නොහැකි මූලාශ්‍රයක් උපුටා දක්වමින් AP පුවත් සේවය වාර්තා කලේ.
මේ අතර ජනාධිපතිවරයා ගමන් ගන්නා මෙම ගුවන් යානය මේ වනවිට ලොව වැඩිම පිරිසක් නිරීක්ෂණය කරමින් පවතින ගුවන් යානය බවට පත්ව තිබෙනවා.
ඒ ලොව පුරා ගුවන් ගමන්වල සජීවී දත්ත ඉදිරිපත් කරන www.flightradar24.com වෙබ් අඩවියට අනුවයි.
මේ අනුව අද දහවල් වනවිට 5000 කට වැඩි පිරිසක් එහි ගුවන් ගමන නිරීක්ෂණය කර ඇති බව සඳහන්.
SV 788 ගුවන් යානය සිංගප්පූරු වේලාවෙන් අද රාත්‍රී 07 ට පමණ චැංගි ජාත්‍යන්තර ගුවන් තොටුපළට ගොඩබස්වනු ඇති.
