හැමිල්ටන් සංචිත බැංකු පුද්ගලික සමාගම නම් ආයතනය විසින් අමෙරිකානු අධිකරණයක් හමුවේ ශ්‍රී ලංකාවට එරෙහිව නඩු පවරා තිබෙනවා.
විදෙස් මාධ්‍ය වාර්තා කරන්නේ, ලබන මාසයේ කල් පිරෙන ඩොලර් බිලියනයක ස්වෛරී බැඳුම්කරයේ තමන්ට හිමි ඩොලර් මිලියන 250 කට වැඩි මුදල ගෙවීම පැහැර හැරීම සම්බන්ධයෙන් මෙලෙස නඩු පවරා ඇති බවයි.
අදාළ බැඳුම්කර හිමියා ඉල්ලා ඇත්තේ, පොලිය ද සමග මූලික මුදලින් ඩොලර් මිලියන 257.5 ක් වහාම ගෙවන ලෙසයි.
ලබන මස 25 වනදාට අදාළ බැඳුම්කරය කල් පිරීමට නියමිත බවයි හැමිල්ටන් සංචිත බැංකු පුද්ගලික සමාගම නිව්යෝර්ක් ෆෙඩරල් අධිකරණය හමුවේ ගොණු කර ඇති අදාළ නඩුවේ දක්වා ඇත්තේ.
මෙම හැමිල්ටන් සංචිත බැංකු පුද්ගලික සමාගම ශාන්ත කිට්ස් දූපත් හි ස්ථාපිත කරන ලද සමාගමක්ද වනවා.
