ඔස්ටේ්‍රලියාවට එරෙහි 02 වන එක්දින ක්‍රිකට් තරගයෙන් ඩක්වත් ලුවිස් න්‍යායට අනුව ශ්‍රී ලංකාවට ළකුණු 26 ක ජයක් හිමිවුණා.
පල්ලේකැලේ ක්‍රීඩාංගණයේ පැවති තරගයේ පළමුවෙන් පන්දුවට පහරදුන් ශ්‍රී ලංකා ඉණිමේ පන්දුවාර 47 යි පන්දු 04 කදී වර්ෂාවෙන් බාධා එල්ල වුණා.
ඒ වනවිට කඩුලු 09 ක් දැවී ශ්‍රී ලංකාව ලබාසිටි ළකුණු සංඛ්‍යාව 220 ක්.
කුසල් මෙන්ඩිස් 36 ක්ද – ධනංජය ද සිල්වා සහ දසුන් ශානක 34 බැගින්ද ලබාගත්තා.
පැට් කමින්ස් ළකුණු 35 කට කඩුලු 04 ක් බිඳහෙලුවා.
තරගය ජයගැනීමට ඔස්ටේ්‍රලියාවට පන්දුවාර 43 කදී හිමිවූ ඉලක්කය ළකුණු 221 ක්.
එහෙත් පන්දුවාර 37 යි එක් පන්දුවකදී ඔවුන් සියලු දෙනා දැවී ගියේ ළකුණු 189 කටයි.
ඩේවිඩ් වෝනර් 37 ක්ද ග්ලෙන් මැක්ස්වෙල් ළකුණු 30 ක්ද ලබාගත්තා.
තරගයේ වීරයා වූ චාමික කරුණාරත්න ළකුණු 47 කට කඩුලු 03 ක් බිඳහෙලුවා.
දුෂ්මන්ත චමීර – දුනිත් වෙල්ලාලගේ සහ ධනංජය ද සිල්වා අතර කඩුලු 02 බැගින් බෙදී ගියා.
දෙරට අතර 03 වන එක්දින තරගය ලබන ඉරිදා කොළඹ ආර් ප්‍රේමදාස ක්‍රීඩාංගණයේදී පැවැත්වීමට නියමිතයි.
