අද රාත්‍රී 12 සිට පූර්ණ එන්නත්කරණයට ලක්වූවන් වෙනුවෙන් වික්ටෝරියා ප්‍රාන්තයේ ලිහිල්වන කොවිඩ් සීමා වික්ටෝරියා ප්‍රාන්ත අගමැති ඩැනියල් ඇන්ඩෲස් විසින් නිවේදනය කර තිබෙනවා.
ඒ අනුව ඥාතීන් හෝ හිත මිතුරන් බැලීමට යාම සඳහා මෙතෙක් පැවති උපරිම සීමාවන් ඉවත් වනු ඇති.
සිල්ලර වෙළඳසැල් – සෞඛ්‍ය සම්බන්ධ ස්ථාන – පාසල් – පොදු ප්‍රවාහනය ඇතුලු අවස්ථා කිහිපයකදී හැර සියලු ගෘහස්ථ කටයුතුවලදී මුව ආවරණ භාවිතය අනිවාර්ය වන්නේ නැහැ.
අලු බඳුන ටෙස්ට් තරගාවලිය වැනි ක්‍රීඩා ඉසව් සඳහා උපරිම ධාරිතාවයෙන් පුද්ගලයන්ට සහභාගී විය හැකි වනවා.
කොවිඩ් ආසාධිතයෙකුගේ සමීපතමයෙකු සඳහා මෙතෙක් පැවති හුදකලා කාල සීමාවද සංශෝධනය කර තිබෙනවා.
ඒ අනුව එම තැනැත්තා එන්නත් මාත්‍රා 02 ම ලබාගෙන ඇති නම් මෙතෙක් පැවති දින 07 හුදකලා කාලය, සෘණාත්මක ප්‍රථිඵලයක් ලැබෙන තුරු පමණක් සීමා කර තිබෙනවා.
සති අන්තය වනවිට පූර්ණ කොවිඩ් එන්නත්කරණ ප්‍රතිශතය සියයට 90 ඉලක්කය අභිබවා යනු ඇති බවට පුරෝකථනය කරමිනුයි මෙම ලිහිල් කිරීම සිදුකර ඇත්තේ.
