ශ්‍රී ලංකාවේ දේවස්ථාන වලට ත්‍රස්ත ප්‍රහාරයක් එල්ල විය හැකි බව සදහන් කරමින් සමාජ මාධ්‍ය සහ විද්‍යුත් මාධ්‍ය ඔස්සේ සංසරණයවන පුවත අදාළ බළධාරින් විසින් විශ්ලේෂණය හෝ තහවුරු නොකරන ලද තොරතුරක් පමණක් බව ආරක්ෂක අමාත්‍යංශය මහජනතාව වෙත දැනුම් දෙනවා.
එබැවින් මෙම තොරතුර සම්බන්ධයෙන් කලබලවීමට හේතුවක් නොමැති බවයි ආරක්ෂක ලේකම් ජනරාල් කමල් ගුණරත්න අවධාරණය කරන්නේ.
ජාඇල – බෝපිටිය – ශාන්ත නිකොලා දෙව් මැදුරට බෝම්බ ප්‍රහාරයක් එල්ලවන බවට තොරතුරු ලැබී ඇති හෙයින් ඒ පිළිබඳව විමසිලිමත්ව සිටින ලෙස නාවික හමුදා නිලධාරීන් පිරිසක් පැමිණ දැනුවත් කර තිබෙනවා.
එම දේවස්ථානයේ ජයන්ත නිමල් පියතුමන් ප්‍රකාශ කළේ පස්වරුවේ නාවික හමුදා නිලධාරීන් කණ්ඩායමක් යළි පැමිණ එය නිවැරදි කළ බවයි.
පෙරවරුවේ වැලිසර නාවික හමුදා කඳවුරෙන් පැමිණ ප්‍රහාරයක් එල්ලවීමට ඉඩ ඇති බවට සිදුකළ ප්‍රකාශය වැරදීමකින් සිදුවූවක් බවත්, එය, නිවැරදි කිරීමට කටයුතු කරන බවත් පස්වරුවේ උස්වැටකෙයියාව නාවික හමුදා කඳවුරේ නිලධාරීන් පිරිසක් දේවස්ථානයට පැමිණ තමාට ප්‍රකාශ කළ බවයි ජයන්ත නිමල් පියතුමා කියා සිටියේ.
